281

ﺍﮎ ﺭﻧﺪ ﮨﮯ ﺍﻭﺭ ﻣﺪﺣﺖِ ﺳﻠﻄﺎﻥ ﻣﺪﯾﻨﮧ ﮨﺎﮞ ﮐﻮﺋﯽ ﻧﻈﺮ ﺭﺣﻤﺖِ ﺳﻠﻄﺎﻥ ﻣﺪﯾﻨﮧ برصغیر کا بڑا شرابی شاعر اور نعت رسول مقبول صلی اللہ علیہ وسلم : رپوٹ محمد جنید خان

ﺍﺟﻤﯿﺮ شریفﻣﯿﮟ ﻧﻌﺘﯿﮧ ﻣﺸﺎﻋﺮﮦ ﺗﮭﺎ، ﻓﮩﺮﺳﺖ ﺑﻨﺎﻧﮯ ﻭﺍﻟﻮﮞ ﮐﮯ ﺳﺎﻣﻨﮯ ﯾﮧ ﻣﺸﮑﻞ ﺗﮭﯽ ﮐﮧ ﺟﮕﺮ ؔﺻﺎﺣﺐ ﮐﻮ ﺍﺱ ﻣﺸﺎﻋﺮﮮ ﻣﯿﮟ ﮐﯿﺴﮯ ﺑﻼﯾﺎ ﺟﺎﺋﮯ ، ﻭﮦ ﮐﮭﻠﮯ ﺭﻧﺪ ﺗﮭﮯ ﺍﻭﺭﻧﻌﺘﯿﮧ ﻣﺸﺎﻋﺮﮮ ﻣﯿﮟ ﺍﻥ ﮐﯽ ﺷﺮﮐﺖ ﻣﻤﮑﻦ ﻧﮩﯿﮟ ﺗﮭﯽ۔ ﺍﮔﺮ ﻓﮩﺮﺳﺖ ﻣﯿﮟ ﺍﻥ ﮐﺎﻧﺎﻡ ﻧﮧ ﺭﮐﮭﺎ ﺟﺎﺋﮯ ﺗﻮ ﭘﮭﺮ ﻣﺸﺎﻋﺮﮦ ﮨﯽ ﮐﯿﺎ ﮨﻮﺍ۔ ﻣﻨﺘﻈﻤﯿﻦ ﮐﮯ ﺩﺭﻣﯿﺎﻥ ﺳﺨﺖ ﺍﺧﺘﻼﻑ ﭘﯿﺪﺍﮨﻮﮔﯿﺎ۔ ﮐﭽﮫ ﺍﻥ ﮐﮯ ﺣﻖ ﻣﯿﮟ ﺗﮭﮯ ﺍﻭﺭ ﮐﭽﮫ ﺧﻼﻑ۔
ﺩﺭﺍﺻﻞ ﺟﮕﺮؔ ﮐﺎ ﻣﻌﺎﻣﻠﮧ ﺗﮭﺎ ﮨﯽ ﺑﮍﺍ ﺍﺧﺘﻼﻓﯽ۔ ﺑﮍﮮ ﺑﮍﮮ ﺷﯿﻮﺥ ﺍﻭﺭ ﻋﺎﺭﻑ ﺑﺎﻟﻠﮧ ﺍﺱ ﮐﯽ ﺷﺮﺍﺏ ﻧﻮﺷﯽ ﮐﮯ ﺑﺎﻭﺟﻮﺩ ﺍﻥ ﺳﮯ ﻣﺤﺒﺖ ﮐﺮﺗﮯ ﺗﮭﮯ۔ ﺍﻧﮩﯿﮟ ﮔﻨﺎﮦ ﮔﺎﺭ ﺳﻤﺠﮭﺘﮯ ﺗﮭﮯ ﻟﯿﮑﻦ ﻻﺋﻖ ﺍﺻﻼﺡ۔ ﺷﺮﯾﻌﺖ ﮐﮯ ﺳﺨﺘﯽ ﺳﮯ ﭘﺎﺑﻨﺪ ﻣﻮﻟﻮﯼ ﺣﻀﺮﺍﺕ ﺑﮭﯽ ﺍﻥ ﺳﮯ ﻧﻔﺮﺕ ﮐﺮﻧﮯ ﮐﮯ ﺑﺠﺎﺋﮯ ﺍﻓﺴﻮﺱ ﮐﺮﺗﮯ ﺗﮭﮯ ﮐﮧ ﮨﺎﺋﮯ ﮐﯿﺴﺎ ﺍﭼﮭﺎ ﺁﺩﻣﯽ ﮐﺲ ﺑﺮﺍﺋﯽ ﮐﺎ ﺷﮑﺎﺭ ﮨﮯ۔ ﻋﻮﺍﻡ ﮐﮯ ﻟﯿﮯ ﻭﮦ ﺍﯾﮏ ﺍﭼﮭﮯ ﺷﺎﻋﺮ ﺗﮭﮯ ﻟﯿﮑﻦ ﺗﮭﮯ ﺷﺮﺍﺑﯽ۔ ﺗﻤﺎﻡ ﺭﻋﺎﯾﺘﻮﮞ ﮐﮯ ﺑﺎﻭﺟﻮﺩ ﻣﻮﻟﻮﯼ ﺣﻀﺮﺍﺕ ﺑﮭﯽ ﺍﻭﺭ ﺷﺎﯾﺪ ﻋﻮﺍﻡ ﺑﮭﯽ ﯾﮧ ﺍﺟﺎﺯﺕ ﻧﮩﯿﮟ ﺩﮮ ﺳﮑﺘﮯ ﺗﮭﮯ ﮐﮧ ﻭﮦ ﻧﻌﺘﯿﮧ ﻣﺸﺎﻋﺮﮮ ﻣﯿﮟ ﺷﺮﯾﮏ ﮨﻮﮞ۔ﺁﺧﺮ ﮐﺎﺭ ﺑﮩﺖ ﮐﭽﮫ ﺳﻮﭼﻨﮯ ﮐﮯ ﺑﻌﺪ ﻣﻨﺘﻈﻤﯿﻦ ﻣﺸﺎﻋﺮﮦ ﻧﮯ ﻓﯿﺼﻠﮧ ﮐﯿﺎ ﮐﮧ ﺟﮕﺮ ؔﮐﻮ ﻣﺪﻋﻮ ﮐﯿﺎ ﺟﺎﻧﺎ ﭼﺎﮨﯿﮯ۔ﯾﮧ ﺍﺗﻨﺎ ﺟﺮﺍﺕ ﻣﻨﺪﺍﻧﮧ ﻓﯿﺼﻠﮧ ﺗﮭﺎ ﮐﮧ ﺟﮕﺮؔ ﮐﯽ ﻋﻈﻤﺖ ﮐﺎ ﺍﺱ ﺳﮯ ﺑﮍﺍﺍﻋﺘﺮﺍﻑ ﻧﮩﯿﮟ ﮨﻮﺳﮑﺘﺎﺗﮭﺎ۔ﺟﮕﺮؔ ﮐﻮ ﻣﺪﻋﻮ ﮐﯿﺎ ﮔﯿﺎ ﺗﻮﻭﮦ ﺳﺮ ﺳﮯ ﭘﺎﺅﮞ ﺗﮏ ﮐﺎﻧﭗ ﮔﺌﮯ۔ ’’ ﻣﯿﮟ ﺭﻧﺪ، ﺳﯿﮧ ﮐﺎﺭ، ﺑﺪ ﺑﺨﺖ ﺍﻭﺭ ﻧﻌﺘﯿﮧ ﻣﺸﺎﻋﺮﮦ ! ﻧﮩﯿﮟ ﺻﺎﺣﺐ ﻧﮩﯿﮟ ‘‘ ۔
ﺍﺏ ﻣﻨﺘﻈﻤﯿﻦ ﮐﮯ ﺳﺎﻣﻨﮯ ﯾﮧ ﻣﺴﺌﻠﮧ ﺗﮭﺎ ﮐﮧ ﺟﮕﺮ ﺻﺎﺣﺐ ؔﮐﻮ ﺗﯿﺎﺭ ﮐﯿﺴﮯ ﮐﯿﺎ ﺟﺎﺋﮯ۔ ﺍ ﻥ ﮐﯽ ﺗﻮ ﺁﻧﮑﮭﻮﮞ ﺳﮯ ﺁﻧﺴﻮ ﺍﻭﺭ ﮨﻮﻧﭩﻮﮞ ﺳﮯ ﺍﻧﮑﺎﺭ ﺭﻭﺍﮞ ﺗﮭﺎ۔ ﻧﻌﺘﯿﮧ ﺷﺎﻋﺮ ﺣﻤﯿﺪ ﺻﺪﯾﻘﯽ ﻧﮯ ﺍﻧﮩﯿﮟ ﺁﻣﺎﺩﮦ ﮐﺮﻧﺎ ﭼﺎﮨﺎ، ﺍﻥ ﮐﮯ دوست ﻧﻮﺍﺏ ﻋﻠﯽ ﺣﺴﻦ ﻃﺎﮨﺮ ﻧﮯ ﮐﻮﺷﺶ ﮐﯽ ﻟﯿﮑﻦ ﻭﮦ ﮐﺴﯽ ﺻﻮﺭﺕ ﺗﯿﺎﺭ ﻧﮩﯿﮟ ﮨﻮﺗﮯ ﺗﮭﮯ، ﺑﺎﻵﺧﺮ ﺍﺻﻐﺮؔ ﮔﻮﻧﮉﻭﯼ ﻧﮯ ﺣﮑﻢ ﺩﯾﺎ ﺍﻭﺭ ﻭﮦ ﭼﭗ ﮨﻮﮔﺌﮯ۔
ﺳﺮﮨﺎﻧﮯ ﺑﻮﺗﻞ ﺭﮐﮭﯽ ﺗﮭﯽ، ﺍﺳﮯ ﮐﮩﯿﮟ ﭼﮭﭙﺎﺩﯾﺎ، ﺩﻭﺳﺘﻮﮞﺴﮯ ﮐﮩﮧ ﺩﯾﺎ ﮐﮧ ﮐﻮﺋﯽ ﺍﻥ ﮐﮯ ﺳﺎﻣﻨﮯ ﺷﺮﺍﺏ ﮐﺎ ﻧﺎﻡ ﺗﮏ ﻧﮧ ﻟﮯ۔ ﺩﻝ ﭘﺮ ﮐﻮﺋﯽ ﺧﻨﺠﺮ ﺳﮯ ﻟﮑﯿﺮ ﺳﯽ ﮐﮭﯿﻨﭽﺘﺎ ﺗﮭﺎ، ﻭﮦ ﺑﮯ ﺳﺎﺧﺘﮧ ﺷﺮﺍﺏ ﮐﯽ ﻃﺮﻑ ﺩﻭﮌﺗﮯ ﺗﮭﮯ ﻣﮕﺮ ﭘﮭﺮ ﺭﮎ ﺟﺎﺗﮯ ﺗﮭﮯ، ﺷﯿﺮﺍﺯﻥ ﺳﮯ ﮨﻤﺎﺭﺍ ﺭﺷﺘﮧ ﻓﺮﺍﻕ ﮐﺎ ﮨﮯ ﻟﯿﮑﻦ ﺷﺮﺍﺏ ﺳﮯ ﺗﻮ ﻧﮩﯿﮟ ﻟﯿﮑﻦ ﻣﺠﮭﮯ ﻧﻌﺖ ﻟﮑﮭﻨﯽ ﮨﮯ ، ﺷﺮﺍﺏ ﮐﺎ ﺍﯾﮏ ﻗﻄﺮﮦ ﺑﮭﯽ ﺣﻠﻖ ﺳﮯ ﺍﺗﺮﺍﺗﻮ ﮐﺲ ﺯﺑﺎﻥ ﺳﮯ ﺍﭘﻨﮯ ﺁﻗﺎ ﮐﯽ ﻣﺪﺡ ﻟﮑﮭﻮﮞ ﮔﺎ۔ ﯾﮧ ﻣﻮﻗﻊ ﻣﻼ ﮨﮯ ﺗﻮ ﻣﺠﮭﮯ ﺍﺳﮯ ﮐﮭﻮﻧﺎﻧﮩﯿﮟ ﭼﺎﮨﯿﮯ، ﺷﺎﯾﺪ ﯾﮧ ﻣﯿﺮﯼ ﺑﺨﺸﺶ ﮐﺎ ﺁﻏﺎﺯ ﮨﻮ۔ ﺷﺎﯾﺪ ﺍﺳﯽ ﺑﮩﺎﻧﮯ ﻣﯿﺮﯼ ﺍﺻﻼﺡ ﮨﻮﺟﺎﺋﮯ، ﺷﺎﯾﺪﻣﺠﮫ ﭘﺮ ﺍﺱ ﮐﻤﻠﯽ ﻭﺍﻟﮯ ﮐﺎ ﮐﺮﻡ ﮨﻮﺟﺎﺋﮯ، ﺷﺎﯾﺪ ﺧﺪﺍ ﮐﻮ ﻣﺠﮫ ﭘﺮ ﺗﺮﺱ ﺁﺟﺎﺋﮯ ﺍﯾﮏ ﺩﻥ ﮔﺰﺭﺍ، ﺩﻭ ﺩﻥ ﮔﺰﺭ ﮔﺌﮯ، ﻭﮦ ﺳﺨﺖ ﺍﺫﯾﺖ ﻣﯿﮟ ﺗﮭﮯ۔ ﻧﻌﺖ ﮐﮯ ﻣﻀﻤﻮﻥ ﺳﻮﭼﺘﮯ ﺗﮭﮯ ﺍﻭﺭ ﻏﺰﻝ ﮐﮩﻨﮯ ﻟﮕﺘﮯ ﺗﮭﮯ، ﺳﻮﭼﺘﮯ ﺭﮨﮯ، ﻟﮑﮭﺘﮯ ﺭﮨﮯ، ﮐﺎﭨﺘﮯ ﺭﮨﮯ، ﻟﮑﮭﮯ ﮨﻮﺋﮯ ﮐﻮ ﮐﺎﭦ ﮐﺎﭦ ﮐﺮ ﺗﮭﮑﺘﮯ ﺭﮨﮯ، ﺁﺧﺮ ﺍﯾﮏ ﺩﻥ ﻧﻌﺖ ﮐﺎ ﻣﻄﻠﻊ ﮨﻮﮔﯿﺎ۔ ﭘﮭﺮ ﺍﯾﮏ ﺷﻌﺮ ﮨﻮﺍ، ﭘﮭﺮ ﺗﻮ ﺟﯿﺴﮯ ﺑﺎﺭﺵ ﺍﻧﻮﺍﺭ ﮨﻮﮔﺌﯽ۔ ﻧﻌﺖ ﻣﮑﻤﻞ ﮨﻮﺋﯽ ﺗﻮ ﺍﻧﮩﻮﮞ ﻧﮯ ﺳﺠﺪۂ ﺷﮑﺮ ﺍﺩﺍ ﮐﯿﺎ۔
ﻣﺸﺎﻋﺮﮮ ﮐﮯ ﻟﯿﮯ ﺍﺱ ﻃﺮﺡ ﺭﻭﺍﻧﮧ ﮨﻮﺋﮯ ﺟﯿﺴﮯ ﺣﺞ ﮐﻮ ﺟﺎﺭﮨﮯ ﮨﻮﮞ۔ ﮐﻮﻧﯿﻦ ﮐﯽ ﺩﻭﻟﺖ ﺍﻥ ﮐﮯ ﭘﺎﺱ ﮨﻮ۔ ﺟﯿﺴﮯ ﺁﺝ ﺍﻧﮩﯿﮟ ﺷﮩﺮﺕ ﮐﯽ ﺳﺪﺭۃ ﺍﻟﻤﻨﺘﮩﯽٰ ﺗﮏ ﭘﮩﻨﭽﻨﺎ ﮨﻮ۔ ﺍﻧﮩﻮﮞ ﻧﮯ ﮐﺌﯽ ﺩﻥ ﺳﮯ ﺷﺮﺍﺏ ﻧﮩﯿﮟ ﭘﯽ ﺗﮭﯽ، ﻟﯿﮑﻦ ﺣﻠﻖ ﺧﺸﮏ ﻧﮩﯿﮟ ﺗﮭﺎ۔ﺍﺩﮬﺮ ﺗﻮ ﯾﮧ ﺣﺎﻝ ﺗﮭﺎ ﺩﻭﺳﺮﯼ ﻃﺮﻑ ﻣﺸﺎﻋﺮﮦ ﮔﺎﮦ ﮐﮯ ﺑﺎﮨﺮ ﺍﻭﺭ ﺷﮩﺮﮐﮯ ﭼﻮﺭﺍﮨﻮﮞ ﭘﺮ ﺍﺣﺘﺠﺎﺟﯽ ﭘﻮﺳﭩﺮ ﻟﮓ ﮔﺌﮯ ﺗﮭﮯ ﮐﮧ ﺍﯾﮏ ﺷﺮﺍﺑﯽ ﺳﮯ ﻧﻌﺖ ﮐﯿﻮﮞ ﭘﮍﮬﻮﺍﺋﯽ ﺟﺎﺭﮨﯽ ﮨﮯ۔ ﻟﻮﮒ ﺑﭙﮭﺮﮮ ﮨﻮﺋﮯ ﺗﮭﮯ۔ ﺍﻧﺪﯾﺸﮧ ﺗﮭﺎ ﮐﮧ ﺟﮕﺮﺻﺎﺣﺐ ؔ ﮐﻮ ﮐﻮﺋﯽ ﻧﻘﺼﺎﻥ ﻧﮧ ﭘﮩﻨﭻ ﺟﺎﺋﮯ ﯾﮧ ﺧﻄﺮﮦ ﺑﮭﯽ ﺗﮭﺎﮐﮧ ﻟﻮﮒ ﺍﺳﭩﯿﺸﻦ ﭘﺮ ﺟﻤﻊ ﮨﻮﮐﺮ ﻧﻌﺮﮮ ﺑﺎﺯﯼ ﻧﮧ ﮐﺮﯾﮟ۔ ﺍﻥ ﺣﺎﻻﺕ ﮐﻮ ﺩﯾﮑﮭﺘﮯ ﮨﻮﺋﮯ ﻣﻨﺘﻈﻤﯿﻦ ﻧﮯ ﺟﮕﺮ ﮐﯽ ﺁﻣﺪ ﮐﻮ ﺧﻔﯿﮧ ﺭﮐﮭﺎ ﺗﮭﺎ۔ﻭﮦ ﮐﺌﯽ ﺩﻥ ﭘﮩﻠﮯ ﺍﺟﻤﯿﺮ ﭘﮩﻨﭻ ﭼﮑﮯ ﺗﮭﮯ ﺟﺐ ﮐﮧ ﻟﻮﮒ ﺳﻤﺠﮫ ﺭﮨﮯ ﺗﮭﮯ ﮐﮧ ﻣﺸﺎﻋﺮﮮ ﻭﺍﻟﮯ ﺩﻥ ﺁﺋﯿﮟ ﮔﺎ۔ﺟﮕﺮ ﺍؔﭘﻨﮯ ﺧﻼﻑ ﮨﻮﻧﮯ ﻭﺍﻟﯽ ﺍﻥ ﮐﺎﺭﺭﻭﺍﺋﯿﻮﮞﮑﻮ ﺧﻮﺩ ﺩﯾﮑﮫ ﺭﮨﮯ ﺗﮭﮯ ﺍﻭﺭ ﻣﺴﮑﺮﺍ ﺭﮨﮯ ﺗﮭﮯ؎
ﮐﮩﺎﮞ ﭘﮭﺮ ﯾﮧ ﻣﺴﺘﯽ ﮐﮩﺎﮞ ﺍﯾﺴﯽ ﮨﺴﺘﯽ
ﺟﮕﺮؔ ﮐﯽ ﺟﮕﺮ ﺗﮏ ﮨﯽ ﻣﮯ ﺧﻮﺍﺭﯾﺎﮞ ﮨﯿﮟ
ﺁﺧﺮ ﻣﺸﺎﻋﺮﮮ ﮐﯽ ﺭﺍﺕ ﺁﮔﺌﯽ۔ﺟﮕﺮ ﮐﻮ ﺑﮍﯼ ﺣﻔﺎﻇﺖ ﮐﮯ ﺳﺎﺗﮫ ﻣﺸﺎﻋﺮﮮ ﻣﯿﮟ ﭘﮩﻨﭽﺎ ﺩﯾﺎ ﮔﯿﺎ۔
’’ ﺭﺋﯿﺲ ﺍﻟﻤﺘﻐﺰﻟﯿﻦ ﺣﻀﺮﺕ ﺟﮕﺮ ﻣﺮﺍﺩﺁﺑﺎﺩﯼ ‘‘!
ﺍﺱ ﺍﻋﻼﻥ ﮐﮯ ﺳﺎﺗﮫ ﮨﯽ ﺍﯾﮏ ﺷﻮﺭ ﺑﻠﻨﺪ ﮨﻮﺍ، ﺟﮕﺮ ﻧﮯ ﺑﮍﮮ ﺗﺤﻤﻞ ﮐﮯ ﺳﺎﺗﮫ ﻣﺠﻤﻊ ﮐﯽ ﻃﺮﻑ ﺩﯾﮑﮭﺎ ’’… ﺁﭖ ﻟﻮﮒ ﻣﺠﮭﮯ ﮨﻮﭦ ﮐﺮﺭﮨﮯ ﮨﯿﮟ ﯾﺎ ﻧﻌﺖ ﺭﺳﻮﻝ ﭘﺎﮎ ﮐﻮ،ﺟﺲ ﮐﮯ ﭘﮍﮬﻨﮯ ﮐﯽ ﺳﻌﺎﺩﺕ ﻣﺠﮭﮯ ﻣﻠﻨﮯ ﻭﺍﻟﯽ ﮨﮯ ﺍﻭﺭ ﺁﭖ ﺳﻨﻨﮯ ﮐﯽ ﺳﻌﺎﺩﺕ ﺳﮯ ﻣﺤﺮﻭﻡ ﮨﻮﻧﺎ ﭼﺎﮨﺘﮯ ﮨﯿﮟ ‘‘ ۔ﺷﻮﺭ ﮐﻮ ﺟﯿﺴﮯ ﺳﺎﻧﭗ ﺳﻮﻧﮕﮫ ﮔﯿﺎ۔ ﺑﺲ ﯾﮩﯽ ﻭﮦ ﻭﻗﻔﮧ ﺗﮭﺎ ﺟﺐ ﺟﮕﺮ ﮐﮯ ﭨﻮﭨﮯ ﮨﻮﺋﮯ ﺩﻝ ﺳﮯ ﯾﮧ ﺻﺪﺍ ﻧﮑﻠﯽ ﮨﮯ …
ﺍﮎ ﺭﻧﺪ ﮨﮯ ﺍﻭﺭ ﻣﺪﺣﺖِ ﺳﻠﻄﺎﻥ ﻣﺪﯾﻨﮧ
ﮨﺎﮞ ﮐﻮﺋﯽ ﻧﻈﺮ ﺭﺣﻤﺖِ ﺳﻠﻄﺎﻥ ﻣﺪﯾﻨﮧ
ﺟﻮﺟﮩﺎﮞ ﺗﮭﺎ ﺳﺎﮐﺖ ﮨﻮﮔﯿﺎ۔ ﯾﮧ ﻣﻌﻠﻮﻡ ﮨﻮﺗﺎ ﺗﮭﺎ ﺟﯿﺴﮯ ﺍﺱ ﮐﯽ ﺯﺑﺎﻥ ﺳﮯ ﺷﻌﺮ ﺍﺩﺍ ﮨﻮﺭﮨﺎ ﮨﮯ ﺍﻭﺭ ﻗﺒﻮﻟﯿﺖ ﮐﺎ ﭘﺮﻭﺍﻧﮧ ﻋﻄﺎ ﮨﻮﺭﮨﺎ ﮨﮯ۔ﻧﻌﺖ ﮐﯿﺎ ﺗﮭﯽ ﮔﻨﺎﮨﮕﺎﺭ ﮐﮯ ﺩﻝ ﺳﮯ ﻧﮑﻠﯽ ﮨﻮﺋﯽ ﺁﮦ ﺗﮭﯽ،ﺧﻮﺍﮨﺶِ ﭘﻨﺎﮦ ﺗﮭﯽ، ﺁﻧﺴﻮﺅﮞ ﮐﯽ ﺳﺒﯿﻞ ﺗﮭﯽ، ﺑﺨﺸﺶ ﮐﺎ ﺧﺰﯾﻨﮧ ﺗﮭﯽ۔ﻭﮦ ﺧﻮﺩ ﺭﻭ ﺭﮨﮯ ﺗﮭﮯ ﺍﻭﺭ ﺳﺐ ﮐﻮ ﺭﻻ ﺭﮨﮯ ﺗﮭﮯ، ﺩﻝ ﻧﺮﻡ ﮨﻮﮔﺌﮯ، ﺍﺧﺘﻼﻑ ﺧﺘﻢ ﮨﻮﮔﺌﮯ، ﺭﺣﻤﺖ ﻋﺎﻟﻢ ﮐﺎ ﻗﺼﯿﺪﮦ ﺗﮭﺎ، ﺑﮭﻼ ﻏﺼﮯ ﮐﯽ ﮐﮭﯿﺘﯽ ﮐﯿﻮﻧﮑﺮ ﮨﺮﯼ ﺭﮨﺘﯽ۔ ’’ ﯾﮧ ﻧﻌﺖ ﺍﺱ ﺷﺨﺺ ﻧﮯ ﮐﮩﯽ ﻧﮩﯿﮟ ﮨﮯ، ﺍﺱ ﺳﮯ ﮐﮩﻠﻮﺍﺋﯽ ﮔﺌﯽ ﮨﮯ ‘‘ ۔ﻣﺸﺎﻋﺮﮮ ﮐﮯ ﺑﻌﺪ ﺳﺐ ﮐﯽ ﺯﺑﺎﻥ ﭘﺮ ﯾﮩﯽ ﺑﺎﺕ ﺗﮭﯽ۔ ﺍﺱ ﻧﻌﺖ ﮐﮯ ﺑﺎﻗﯽ ﺍﺷﻌﺎﺭ ﯾﻮﮞ ﮨﯿﮟ :
ﺩﺍﻣﺎﻥ ﻧﻈﺮ ﺗﻨﮓ ﻭ ﻓﺮﺍﻭﺍﻧﯽِ ﺟﻠﻮﮦ
ﺍﮮ ﻃﻠﻌﺖِ ﺣﻖ ﻃﻠﻌﺖِ ﺳﻠﻄﺎﻥِ ﻣﺪﯾﻨﮧ
ﺍﮮ ﺧﺎﮎِ ﻣﺪﯾﻨﮧ ﺗﺮﯼ ﮔﻠﯿﻮﮞ ﮐﮯ ﺗﺼﺪﻕ
ﺗﻮ ﺧﻠﺪ ﮨﮯ ﺗﻮ ﺟﻨﺖ ِﺳﻠﻄﺎﻥ ﻣﺪﯾﻨﮧ
ﺍﺱ ﻃﺮﺡ ﮐﮧ ﮨﺮ ﺳﺎﻧﺲ ﮨﻮ ﻣﺼﺮﻭﻑِ ﻋﺒﺎﺩﺕ
ﺩﯾﮑﮭﻮﮞ ﻣﯿﮟ ﺩﺭِ ﺩﻭﻟﺖِ ﺳﻠﻄﺎﻥِ ﻣﺪﯾﻨﮧ
ﺍﮎ ﻧﻨﮓِ ﻏﻢِ ﻋﺸﻖ ﺑﮭﯽ ﮨﮯ ﻣﻨﺘﻈﺮِ ﺩﯾﺪ
ﺻﺪﻗﮯ ﺗﺮﮮ ﺍﮮ ﺻﻮﺭﺕِ ﺳﻠﻄﺎﻥ ﻣﺪﯾﻨﮧ
ﮐﻮﻧﯿﻦ ﮐﺎ ﻏﻢ ﯾﺎﺩِ ﺧﺪﺍ ﻭﺭ ﺷﻔﺎﻋﺖ
ﺩﻭﻟﺖ ﮨﮯ ﯾﮩﯽ ﺩﻭﻟﺖِ ﺳﻠﻄﺎﻥ ﻣﺪﯾﻨﮧ
ﻇﺎﮨﺮ ﻣﯿﮟ ﻏﺮﯾﺐ ﺍﻟﻐﺮﺑﺎ ﭘﮭﺮ ﺑﮭﯽ ﯾﮧ ﻋﺎﻟﻢ
ﺷﺎﮨﻮﮞ ﺳﮯ ﺳﻮﺍ ﺳﻄﻮﺕِ ﺳﻠﻄﺎﻥ ﻣﺪﯾﻨﮧ
ﺍﺱ ﺍﻣﺖ ﻋﺎﺻﯽ ﺳﮯ ﻧﮧ ﻣﻨﮫ ﭘﮭﯿﺮ ﺧﺪﺍﯾﺎ
ﻧﺎﺯﮎ ﮨﮯ ﺑﮩﺖ ﻏﯿﺮﺕِ ﺳﻠﻄﺎﻥ ﻣﺪﯾﻨﮧ
ﮐﭽﮫ ﮨﻢ ﮐﻮ ﻧﮩﯿﮟ ﮐﺎﻡ ﺟﮕﺮؔ ﺍﻭﺭ ﮐﺴﯽ ﺳﮯ
ﮐﺎﻓﯽ ﮨﮯ ﺑﺲ ﺍﮎ ﻧﺴﺒﺖ ِﺳﻠﻄﺎﻥ ﻣﺪﯾﻨﮧ

اس خبر پر اپنی رائے کا اظہار کریں

اپنا تبصرہ بھیجیں